Организмда иң мөһиме булып иммун системаһы тора. Әгәр ул үҙ функцияһын үтәмәһә, сәләмәтлек менән проблемалар барлыҡҡа килә. Шуға күрә ауырыуҙы витаминдар етмәү менән генә аңлатып булмай.
Иммунитетты кәметеүсе факторҙар
Улар - стресс, тейешенсә туҡланмау, йоҡо туймау һәм организмда йәшенгән вируслы инфекциялар.
Шулай уҡ даими рәүештә төрлө дарыуҙар, айырыуса антибиотиктар ҡулланыу иммунитет эшмәкәрлеген боҙа.
Киҙеүҙән нисек һаҡланырға
Киҫкен респиратор ауырыу өс көндән ашыу дауам итһә, табипҡа күренергә кәрәк. Мин грипҡа ҡаршы вакцина яһатыу яҡлы. Уны организм сирләмәгән ваҡытта, йәиһә ауырыуҙан һуң ике аҙна үткәс яһатырға ярай.
Гайморит - имунитет торошон күрһәтеүсе индикатор
Гайморит – танау ҡыуышлығы ялҡынһыныуы ғына түгел. Ул тотош иммун системаһының түбәнәйеүе тураһында ла белдерә.
Гайморитты киҫәтеү өсөн танау ҡыуышлығын тоҙ менән йыуҙырыу дөрөҫ түгел. Иң дөрөҫө - аптеканан махсус һыу алып, шуны ҡулланыу. Сөнки тоҙло шыйыҡсаны үҙебеҙ эшләгән осраҡта, концентрация дөрөҫ булмауы мөмкин, был – шеш барлыҡҡа килеүгә сәбәп булып тора.
Үҙ аллы дауаланыу хәүефле
Танау ҡыуышлығын үҙ аллы дауаларға ярамай. Унда ҡан тамырҙары бик күп. Бөтә ҡан танау аша баш мейеһенә китә, шуға был мәсьәләгә бик етди ҡарарға кәрәк.
