Ғаиләне яҡлау, традицион ғаилә ҡиммәттәрен һаҡлау
өлкәһендә дәүләт сәйәсәтен популярлаштырыу маҡсатында Рәсәй Президенты Владимир
Путин 2024 йылды Рәсәйҙә Ғаилә йылы тип иғлан итте. Быға тиклем дә Рәсәйҙә -
2008 йыл, Башҡортостанда 2018 йыл Ғаилә йылы булғайны.
Ә 2012 йыл Башҡортостанда Имен бала саҡ һәм
ғаилә ҡиммәттәрен нығытыу йылы билдәһе аҫтында үтте.
Балалы ғаиләләр Башҡортостан Республикаһында халыҡтың артыуын тәьмин итеүҙә мөһим роль уйнай. Улар тотороҡло һәм сәләмәт йәмғиәттең нигеҙе булып тора. Ғаиләләр яуаплы, эшһөйәр һәм патриотик граждандар булып үҫкән балалар тәрбиәләй. Башҡортостанда демографик хәлде яҡшыртыу һәм балалар һәм ата-әсәләр өсөн уңайлы шарттар булдырыу өсөн республика ғаилә институтына комплекслы ярҙам күрһәтеү буйынса сәйәсәт алып бара.
"Беҙҙе республикалағы демографик хәл бик борсой. Был иң
ҡатмарлы мәсьәләләрҙең береһе. Күп балалылыҡ һәр ваҡыт Башҡортостан
Республикаһы территорияһында йәшәгән күп һанлы халыҡтарҙың һыҙаттары булып
тора. Әйҙәгеҙ ошо традицияны бергәләп һаҡлайыҡ", - тип белдерҙе Радий
Хәбиров.
Республика уңайлы шарттарҙа үҫешергә мөмкинлек биреп, күп балалы ғаиләләр
хаҡында хәстәрлек күрә.
